Kryetari i Drenasit, Ramiz Lladrovci, ka reaguar pas deklarimeve të kryetarit të Partisë Demokratike të Kosovës, Bedri Hamza, duke theksuar se qasja aktuale e drejtuesve të partisë nuk po i shërben forcimit të PDK-së dhe as unitetit të brendshëm.

Lladrovci kritikon mënyrën se si Hamza po tenton të barazojë shkakun me pasojën, duke thënë se një qasje e tillë nuk e ndihmon as zhvillimin e partisë, as forcimin e degëve.

“Mësimi nga Drenasi, siç shihet, nuk pati efekt. Reflektimet në opinion nga ndonjë eksponent i lodhtë me ligjërata koti, apo nga z. Hamza që synon të barazoj shkakun dhe pasojën. Kjo nuk është rrugë për ta fuqizuar partinë as degën. Uniteti është zotim i përkushtimit për qëllime më të larta se fati i një dege apo individi. Uniteti është kusht i fitores për ta ndryshuar gjendjen e Kosovës, e cila qëndron mbi çdo sakrificë tonën”.

‘Situata në PDK kërkon ridefinim të qasjes dhe metodave të veprimit politik dhe organizativ. Kjo mund të bëhet duke u shërbyer me gjuhën e fitimtarëve me vizion, pa kushte dhe pa hile. Shkurtpamësinë politike do larguar nga partia e krijuar nga heronjtë tanë të luftës dhe paqes, duke përfaqësuar breza të tërë me përkushtim atdhetar, për Kosovën shtet me vlera euro-atlantike. Ndryshe, keqbërësit e bedelët politikë do të mbesin shenjë dalluese e partisë shteformuese dhe shtetndërtuese”, shkroi ai./Arbresh.info